Hezkuntzak Nafarroako Hezkidetza Plan berria ezartzen duen foru agindua onetsi du - Hezkuntzak Nafarroako Hezkidetza Plan berria ezartzen duen foru agindua onetsi du - Dpto

Nafarroako Hezkidetza Plan berria ezartzen duen foru agindua onartu du Hezkuntza Departamentuak. Plan horren helburua mota guztietako indarkeria sexistak prebenitu eta gizonen eta emakumeen arteko desberdintasunak ezabatuko dituen eskola eredua finkatzea da. Plana gaur argitaratu da Nafarroako Aldizkari Ofizialean, eta lan-prozesu luze bati amaiera eman dio. Jendaurrean erakusteko prozesuan jasotako ekarpenak jaso ditu, eta, plana definitzeko, hezkidetzako prestakuntza-prozesuan lan egiten duten 70 tutore baino gehiagoren laguntza izan du.

 

Emakumeen eta Gizonen arteko Berdintasunari buruzko apirilaren 4ko 17/2019 Foru Legeak ezartzen duen bezala, Hezkidetza Plan hau Nafarroako curriculum autonomikoaren parte izanen da eta, hura zehazteko SKOLAE programa bezala, diru publikoarekin finantzatutako ikastetxe guztietan nahitaez bete beharrekoa izanen da, abuztuaren 18ko 72/2021 Foru Dekretuaren 4.5 artikuluan xedatutakoaren arabera.

 

Nazioarteko hainbat hitzarmenetan oinarrituta, Plana estatu eta foru mailako arau-esparru zabal batek bermatzen du, eta horrek berdintasunerako hezkuntza egitera behartzen du.

 

Plan berriaren oinarria 72/2021 Foru Dekretua da, Nafarroako Foru Komunitateko hezkuntza sistemako ikastetxe publiko eta itunduetan hezkidetza arautzen duena. Dekretu horrek, 17/2019 foru-legearen subsidiarioa, honela definitzen du hezkidetza lege horretan: “Ekintza hezitzaile bat da, aukera-berdintasun erreala bultzatzen duena eta emakumeen eta gizonen esperientzia, gaitasunak eta gizarte- eta kultura-ekarpena balioesten dituena eskubide-berdintasunean, estereotipo sexistarik, homofobikorik, bifobikorik, transfobikorik edo androzentrikorik gabe, eta sexuagatiko, sexu-orientazioagatiko edo genero-identitateagatiko diskriminazio-jarrerarik gabe”.

 

Hezkuntza-tresna gisa, planak bizikidetza demokratikoa eta berdintasunezkoa lortzeko balio behar du, emakumeen eta gizonen arteko errespetuan oinarritua, eta hezkuntza-kalitatea eta inklusiboa lortzeko ezinbesteko elementua izan behar du, ikasleen garapen integrala bermatzen baitu eta genero-joerarik gabe berdintasunean bizitzeko gaitasuna ematen baitio.

2024ko otsailean, Hezkuntzak iragarri zuen Auzitegi Gorenaren aurrean kasazio-errekurtsoa aurkeztuko zuela NJANeko administrazioarekiko auzien salak emandako epaiaren aurka, zeinaren bidez 2021-2023ko Hezkidetza Plana baliogabetu baitzen, izapidetze-akatsak zirela eta. Sailak ebazpen judizialarekiko errespetua adierazi zuen, baina argitu zuen ez zetorrela bat hainbat familiaren helegitea aintzat hartuz Hezkuntza sailburuaren 92/2021 Foru Agindua eta Nafarroako Gobernuaren 2023ko martxoaren 29ko Erabakia –orduan baliogabetutako Plana garatzen zutenak– baliogabetu zituen epaiaren argudiaketarekin. Hezkuntza Sailaren ustez, baliogabetutako plana ez zen arau bat, administrazio-egintza soil bat baizik; izan ere, ez zuen bertan jarraitzeko bokaziorik, gauzatu egiten zen eta lehendik zegoen eskubidea aplikatzea zekarren. Aurreko Planaren baliogabetze judizialak ez zuen inolako eragin praktikorik izan ikastetxeetan, eta une horretan bertan sailak jakinarazi zuen Hezkidetza Plan berri bat izapidetzen ari zela, Nafarroako Justizia Auzitegi Nagusiak bere epaian ezarritako eskakizunen arabera. Aurrekoa ez bezala, Hezkidetza Plan berria indarrean egongo da orain onartutako foru agindu hau aldatu edo indargabetzen ez den bitartean.