Hezkuntzak eta NUKF-ek Nafarroako Haur Hezkuntzako lehen zikloaren kudeaketa zehazteko hitzarmena sinatu dute - Hezkuntzak eta NUKF-ek Nafarroako Haur Hezkuntzako lehen zikloaren kudeaketa zehazteko hitzarmena sinatu dute - Dpto

Nafarroako Gobernuko Hezkuntza sailburu Carlos Gimenok eta Nafarroako Udal eta Kontzejuen Federazioko (FNMC) lehendakari Juan Carlos Castillok gaur sinatu dute Nafarroako Foru Komunitatean Haur Hezkuntzako lehen zikloaren hezkuntza-ikuspegia eta kudeaketa-eredua zehazteko oinarriak ezartzen dituen hitzarmena.

Bi ordezkariek sinatutako hitzarmenari jarraiki, Nafarroako Gobernuko Hezkuntza eta Lurralde Kohesioko Departamentuek eta FNMCk Nafarroako haur-eskolak kudeatzeko ereduak eta alternatibak aztertuko dituzte, honako hauek zehaztuz: hezkuntza-kudeaketa, kudeaketa ekonomikoa eta pertsonala, finantzazioa, inplikatutako administrazioen arteko lankidetza eta koordinazioa eta alde sozialarekin elkarrizketarako sistema ezartzeko prozedura.

Hitzarmenak ezartzen duenez, Foru Gobernuak eta Udal Federazioak Haur Hezkuntzako lehen zikloari dagokion eskaintza publikoa planifikatuko dute, baita eskola mapa eta hizkuntza modalitate eta eskaintzak ere. Gainera, ziklo honetako eskumenen mugaketa aztertuko dute, eta honako gai hauek jorratuko dituzte: ikastetxeen tipologia, ikastetxeen sorrera eta aldaketa, haien azpiegiturak eta ekipamendua, eta onarpen-prozesua arautzen duen araudia, haur-eskolen erregelamendu organikoa, horien finantziazioa eta egutegia eta ordutegia.

Hezkuntza, Lurralde Kohesioa eta FNMCren helburua da lehen hezkuntza-ziklo hau unibertsalizatzea, doakotasuna eta izaera publikoa izatea, eta helburu horiek lortzeko bide bateratua ezartzeko konpromisoa hartzen du. Foru Gobernuak eta Nafarroako Udal eta Kontzejuen Federazioak nahi dute Haur Hezkuntzako lehen zikloko ikastetxeak kalitateko hezkuntza-inguruneak izatea, desberdintasun pertsonalak, kulturalak eta sozialak konpentsatzeko, haurrei, familiekin lankidetzan, beren nortasuna eta gaitasun guztiak garatzeko prozesu ezin hobea eskaintzeko, ongizatearen eta segurtasunaren esparruan.

Gaur sinatutako hitzarmenaren hirugarren klausulan, Nafarroako Haur Hezkuntzako Lehen Zikloko Batzordea sortzea aurreikusten da. Batzorde hori izango da lehen hezkuntza-ziklo horren hezkuntza-ikuspegia eta kudeaketa-eredu bateratua zehazteko hausnarketa-esparrua eta tresnak bultzatzeaz arduratuko den erakundea. Batzorde hori foru agindu bidez sortu da, eta zortzi kidek osatuko dute: horietako hiru Hezkuntza Departamentuaren ordezkari, Lurralde Kohesioko Departamentuaren ordezkari bat eta lau pertsona Nafarroako Udal eta Kontzejuen Federazioaren ordezkari. Bi kidek lehendakari eta idazkari karguak beteko dituzte. Batzordeak egoki deritzona gonbidatzen ahalko du bere lan bileretara, aholku emateko eta proposatutako helburuak lortzen laguntzeko. Batzordeak prestatzen dituen ekimen guztiak hitzarmena sinatu duten entitateei igorriko zaizkie, garatu eta abian jar ditzaten.

Nafarroako Haur Hezkuntzako Lehen Zikloko Batzordea urteko lehen hiruhilekoan eratu eta hasiko da, ordezkariak izendatu ondoren. Jarduketen egutegia eta lan bileren maiztasuna berak ezarriko ditu. Nolanahi ere, urtean hiru aldiz bildu beharko da gutxienez.