Ijito etniako ikasleak, komunitate honetako ikasleak eskolatzera animatzen dituen kanpainaren protagonistak - Ijito etniako ikasleak, komunitate honetako ikasleak eskolatzera animatzen dituen kanpainaren protagonistak - Dpto
“Prestakuntza aurrerapenerako eta aukera-berdintasunerako bidea da” kontzientziazio-ekimena Hezkuntza Departamentuan egindako ekitaldi batean aurkeztu da gaur
2021/04/20
Hezkuntza Sailak eta Nafarroako ijito-komunitateak gaur goizean jakinarazi dute “Prestakuntza aurrerapenerako eta aukera-berdintasunerako bidea” kontzientziazio-kanpaina, etnia horretako ikasleak eskolatzera animatzeko. Ijitoak dira kanpainaren protagonistak. Hainbat herritan egindako bideoen bidez, “jasotako hezkuntza-prestakuntzarekiko harrotasuna” erakusten dute.
Bideoak Hezkuntza Departamentuaren egoitzan, Iruñean, egindako lanaldian aurkeztu dira. Bertan parte hartu dute Hezkuntza, Osasun eta Gizarte Eskubideen Inklusio, Berdintasun eta Bizikidetza Zerbitzuko arduradunek, GazKalo eta Ijito Idazkaritzako kolektiboetako ordezkariek, ikastetxeetako irakasleek, sustatzaileek eta osasun arlokoek, bitartekariek eta abarrek.
Carlos Gimeno Hezkuntza sailburuak bideoen aurkezpenean parte hartu du eta eskerrak eman dizkie ikasle ijitoen eskolatzea hobetzeko lan egin duten erakunde eta talde guztiei. “Hezkuntza”, esan du Gimenok, “oinarrizko eskubidea da, eta Hezkuntza Sailak izugarri baloratzen du eskubide hori sustatzeko egin duzuen ahalegina, Nafarroako Gobernuak ikasle guztiak ikasgeletara joateko aukera bermatzearen alde egindako apustu sendo eta irmoarekin bat datorrena”.
Ikus-entzunezkoak Nafarroako hainbat eskualdetan grabatu dira (Berriozarren, Zarrakaztelun, San Adrianen eta Zangozan), profil desberdinetako pertsonekin. Pertsona horiek beren esperientziak kontatzen dituzte, hezkuntza-prestakuntza duten ijito izatearen errespetuan eta harrotasunean oinarrituta, eta beren helburuen eta bizi-itxaropenen berri ematen dute. Bideo-produkzio hori berariaz zabalduko da Nafarroako ijitoen artean, aurre-inskripzio eta aurrematrikula egiteko epeetan.
Lan batzordea
2020ko uztailean, Nafarroako Gobernuak departamentu arteko batzorde bat sortu zuen, Hezkuntza, Osasun eta Gizarte Eskubideetako eta ijito kolektiboetako ordezkariekin, osasuna sustatzeko eragileekin, eskola sustatzaileekin eta bitartekariekin, 2020-2021 ikasturterako ijitoen arretarekin zerikusia duten ekintzak abian jartzeko.
Batzorde horren helburua ikasle ijitoen eskoletara joatea hobetzea da, bereziki COVID-19 pandemiak markatutako testuinguruan. Lan-talde horrek, besteak beste, “atez ate” harreman bat zabaldu zuen joan den ikasturtean, familietara modu pertsonalizatuan hurbiltzeko, pandemiaren ezaugarriak eta prebentzio-neurriak ezagutarazteko ikastaroak eman zituen, hainbat eremu geografikoren arteko lana koordinatu zuen eta ikastetxeekin lan egin zuen ikasle ijitoei harrera egiteko.
Ijitoen komunitatearen erantzuna “oso positiboa” izan zen, baina eskolatze-hasieratik eskolara joatearen garrantzia eta normalizatutako eskolatze-ohiturari eustea erronka handia da oraindik ere.