Lanbide Heziketako 334 irakasle teknikoek Bigarren Hezkuntzako irakasleen kidegoan sartzeko aukera izango dute - Lanbide Heziketako 334 irakasle teknikoek Bigarren Hezkuntzako irakasleen kidegoan sartzeko aukera izango dute - Dpto

Hezkuntza Departamentuak, abenduaren 19ko 272/2022 Ebazpenaren bidez Nafarroako Aldizkari Ofizialean gaurko egunez argitaratutako deialdiari jarraiki, Nafarroako Foru Komunitatearen eremuan, Lanbide Heziketako Irakasle Teknikoen kidegoa (desagertzera doana) Bigarren Hezkuntzako Irakasleen Kidegoan integratzeko prozedura onartu du.

Ebazpen honek bete egiten du Hezkuntzari buruzko maiatzaren 3ko 2/2006 Lege Organikoan, LOMLOEk egindako aldaketen ondoren, eta Lanbide Heziketa Antolatu eta Integratzeari buruzko martxoaren 31ko 3/2022 Lege Organikoan, urriaren 4ko 800/2022 Errege Dekretuan garatu dena.

 

Deialdiaren arabera, Lanbide Heziketako irakasle teknikoen kidegoko funtzionarioek, iraungitzear daudenek, baldin eta deialdiko baldintzak betetzen badituzte, Bigarren Hezkuntzako irakasleen kidegoan sartzeko eskatu ahal izango dute, deialdi hau Nafarroako Aldizkari Ofizialean argitaratu eta biharamunetik 20 egun balioduneko epean. Baldintza horiek dira kidego horretako kide izatea eta organikoki Nafarroako Gobernuko Hezkuntza Departamentuari atxikita egotea, jardunean, zerbitzu berezietan edo eszedentzia berezian egotea, eta unibertsitateko gradu-titulua, lizentziaduna, ingeniaria eta arkitektoa edo irakaskuntzako funtzio publikoan sartzeko baliokidea den titulua edo Bigarren Hezkuntzako Irakasleen kidegoko espezialitateetan irakaskuntzari dagokionez baliokidea den beste titulu bat (unibertsitateko diplomatura, ingeniaritza teknikoa) izatea edo eskuratzeko moduan egotea. Era berean, 2026ko urtarrilaren 19ra arte irekitako prozedura bat arautzen da, aurreko paragrafoan adierazitako epean integrazioa eskatu ez duten eta ezarritako baldintzak betetzen dituzten langileek ordura arte Bigarren Hezkuntzako irakasleen kidegoan sartzeko eskaera egin dezaten.

 

Ukitutako irakasleen aldarrikapen zahar bat da, deialdi honen bidez asebete dena, eta Nafarroa Estatuko xedapen arautzailea aplikatzen duen lehen erkidegoetako bat da.

 

Une honetan, Nafarroan, Lanbide Heziketako irakasle teknikoen kidegoko 334 funtzionario daude iraungi beharrekoak. Irakasle horiek, hala badagokio, eskatutako baldintzak betetzen dituztela egiaztatu ahal izango dute, eta Bigarren Hezkuntzako irakasleen kidegoan sartuko dira.