angle-left Ikaskuntza Komunitateen Nazioarteko VIII. Topaketa

2019/11/04

Ikaskuntza Komunitateen Nazioarteko VIII. Topaketa azaroaren 15ean eta 16an eginen da Nafarroako Unibertsitate Publikoan (NUP), bertako El Sario eraikinean. Dagoeneko Nafarroan badira hamahiru ikastetxe ikaskuntza komunitate bilakatu direnak eta buru-belarri dihardutenak honela egituratuko den topaketa antolatzen:

  • 15ean, ostiralean, 6 solasaldi dialogiko eginen dira hainbat lan zientifiko eta literariori buruz, Iruñeko San Frantzisko Ikastetxe Publikoan, 19:30etik aitzina.
  • 16an, larunbatean, Topaketa bera izanen da, NUPeko El Sario eraikinean, Fernando Remacha aretoan eta ondokoetan. Hasierako hitzaldia ikasgeletako hezkuntza-inklusioari buruzkoa izanen da eta amaierakoa, berriz, aukerako maskulinitate berriei buruzkoa. Era berean, aukera izanen dugu ikaskuntza dialogikoari eta hezkuntza-jarduketa arrakastatsuei buruzko esperientzia hagitz aberasgarriak ezagutzeko, bai aldi bereko zenbait lantegiren bitartez, bai Ikaskuntza-komunitateen esperientzia egunez egun bizi duten irakasleek kontatuko dituzten istorio narratiboen bidez. Jardunaldi osoaren eduki zientifikoa CREA-Desberdinkeriak Gainditzeko Teoria eta Praktikak Ikertzeko Zentroak gainbegiratu du, Bartzelonako Unibertsitatearen mendeko ikerguneak.

Nazioarteko Topaketan parte hartu nahi dutenek doan eman dezakete izena webgune honetan: www.cda2019.com/ Hor bertan aurkituko dute bi egunetako egitaraua eta egunez egun gaurkotzen diren informazioak.

Topaketa abagune paregabea izanen da bertatik bertara ezagutzeko Europako zenbait herrialdetako ikerketak, emaitza bikainak erakusten ari direnak hala gizarte eraldaketari dagokionez, nola ikaskuntzen hobekuntzari dagokionez.