Landa eskolak

Landa-eskolatzat hartzen dira Haur Hezkuntzako eta Lehen Hezkuntzako ikastetxe publikoak, landa-eremuetan kokatuta daudenak eta gradu anitz duten unitateak dituztenak, hau da, taldeak non irakasle batek aldi berean ikasturte bat baino gehiagoko ikasleak hartatzen dituen. Hortaz, 9 unitate baino gutxiago izanen dituzte eskola hauek. Hauetako batzuek talde bakarra dute ikasle guztiendako, eta "eskola unitario" izendapena dute.

Kontaktua: Haur Eskolen eta Landa Eskolen Atala
Mezu elektronikoak: dpto-escuelasinfantilesyrurales@educacion.navarra.es
Telefonoa: 848426555 – 848424803

angle-left Eloko landa eskolako Lehen Hezkuntzako 3. mailako ikasleek irratiaren mundua barrutik ezagutu dute

2026/04/28

Santa Barbara ikastetxeko 3. mailako neska-mutilek esperientzia hezitzaile oso berezia bizi izan dute komunikazioaren mundu zirraragarrian murgilduz. Gelan albiste-generoa landu ondoren, ikasitakoa sendotzeko modu hoberik ez zegoen informazioa egunero bizirik sortzen den toki batera hurbiltzea baino: irrati batera.

Eguna RTVE Nafarroako instalazioetara egindako bisitarekin hasi zen, eta han Javier Izu izan genuen lagun eta gidari. Bisitan zehar, ikasleek telebistako eta irrati-estudioak ezagutzeko aukera izan zuten, eta lehen eskutik ikusi zuten nola prestatzen eta emititzen diren albistegiak.

Javier Izuk modu hurbil eta argian azaldu zizkien komunikabideen funtzionamenduaren oinarriak. Besteak beste, irrati publikoen eta pribatuen arteko desberdintasunez hitz egin zuen, baita Madrilgo egoitza nagusiarekin koordinatzeak informazio-saioak prestatzeko duen garrantziaz ere. Ikasleek interesa handiz jarraitu zuten azalpena, galderak eginez eta uneoro parte hartuz.

Ondoren, Onda Cero Iruñera joan ziren, eta eguneko unerik zirraragarrienetako bat bizi izan zuten: irratsaio bat zuzenean entzun eta ikustea. Estudio barruan egoteak aukera eman zien irratiaren berehalakotasuna, antolaketa eta talde-lana hobeto ulertzeko.

Bisita Europako FM irrati-estudioan amaitu zen. Bertan giroa erabat aldatu zen, musikak hartu baitzuen protagonismoa. Irrati musikal batean nola lan egiten den ezagutzeaz gain, esatarien lana eta musika-aukeraketak programazioan duen garrantzia ere ikasi zuten.

Oso egun aberasgarria eta emozioz betea izan zen. Irratia barrutik ezagutzea, komunikazioko profesionalekin egotea eta hedabideen atzean dagoen lana ikustea bizipen ahaztezina izan da ikasleentzat.

Ikastetxetik eskerrik beroenak eman nahi dizkiegu bisitan lagundu gintuzten profesional guztiei, euren agenda estuak izan arren denbora eskaini eta lanerako espazioak ireki zizkigutelako. Haiei esker, ikasleek ez zuten bakarrik ikasi: irratia egitea zer den sentitzeko aukera ere izan zuten.

📖 Irakurri albistea eskolako webgunean