Araudia

Administrazioko funtzionarioek edo lan-kontratudunek zernahi esparrutan aplikagarria den araudiaren gaineko informazioa eskura dute, besteak beste, eszedentziei edo erretiroei dagokiena.

Kontaktua: Langileen Araubide Juridikoaren Zerbitzua
Mezu elektronikoak: srjpeduca@navarra.es
Telefonoa: 848 42 69 74

Lan utzialdiak

Araudia

Abuztuaren 30eko 251/1993 Legegintzako Foru Dekretuaren bidez onetsitako Nafarroako administrazio publikoetako Langileen Estatutuaren Testu Bateginaren 26. eta 27. artikuluak.

 

Eszedentzia berezia

Funtzionarioak edo kontratatuak eskatuta, eszedentzia berezia onartzen ahal da, kasuan-kasuan ezartzen den aldirako, honelako arrazoi hauek egiaztatuz gero:

- Hiru urterako, gehienez, seme-alaba bakoitza zaintzeko direla, naturalak edo adoptatuak, edo adopzio aurreko harrerakoak edo harrera iraunkorrekoak. Hiru urte horiek haurra jaiotzen denetik edo, bestela, epaileen edo administrazioaren ebazpenaren egunetik aurrera kontatuko dira.

- Hiru urterako, gehienez, langilearen kargura dagoen odoleko edo ezkontza bidezko ahaideren bat zaintzeko, bigarren gradura artekoa -hori barne-, baldin eta adinagatik edo istripu edo eritasun baten ondorioz bere kasa bizitzeko gauza ez bada eta lan ordaindurik ez badu.

Eszedentzia berezia emateko, funtzionarioak deklaratu beharko du bitartean ez duela beste jarduera profesionalik edo lanik eginen.
Eszedentzia berezian dauden funtzionarioek jatorrizko lanpostua gordetzeko eskubidea izanen dute, baina ez dute eskubide ekonomikorik sortuko. Dena den, antzinatasunaren ondorioetarako, egoera horretan ematen duten aldi osoa aintzat hartuko zaie. Eskubide pasiboen ondorioetarako, haien babes sozialeko arautegian ezarritakoari jarraikiko zaio.
Eszedentzia berezia duten langileek eszedentzialdia bukatu eta hurrengo egunean hasi beharko dute lanean jatorrizko lanpostuan.
Eszedentzia bereziko aldia bukatu gabe ere, interesdunek noiznahi eskatzen ahalko dute jarduneko zerbitzura itzultzea.
Eszedentzia agortu aurretik jardunera itzuliz gero, eszedentzia bereziko beste aldi bat eskatzen ahalko da subjektu eragile bera dela kausa, baina behin bakarrik, gehieneko epea bete arte gelditzen den denborarako. Kasu horietan, gutxienez sei hilabete utzi beharko dira jarduneko zerbitzura itzultzen denetik hurrengo eszedentzialdia hasi arte.
Garrantzitsua da azpimarratzea langile guztiak, funtzionarioak edo kontratatuak, eskatzen ahal dutela eszedentzia berezia.Hiru urterako, gehienez, haurra jaiotzen denetik edo, bestela, adoptatu aurreko harrera-fasean nahiz era iraunkorraren kasuan epaileen edo administrazioaren ebazpenaren egunetik aurrera kontatuko dira.
Hiru urtetan lanpostua gordetzea.
Lanera itzultzea edozein unetan eskatzen ahal du (itzuli baino 15 egun lehenago). 

Aurkeztu beharreko agiriak:

- Seme-alaba zaintzeagatik, edo adopzioagatik edo harrera iraunkorragatik edo adoptatu aurreko harrera iraunkorragatik:

  • Giza Baliabideen Zerbitzura zuzendutako eskaera, hasierako data adieraziz, eta bitartean ez duela beste jarduera profesionalik edo lanik eginen adieraziko duen aitorpena.
  • Familia liburuaren fotokopia, bertan eszedentzia eskaera egitea ekarri duen adingabea agertu beharko du.

- Ahaidea zaintzeko:

  • Giza Baliabideen Zerbitzura zuzendutako eskaera, hasierako data adieraziz, eta bitartean ez duela beste jarduera profesionalik edo lanik eginen adieraziko duen aitorpena.
  • Osasun etxeko gizarte laguntzailearen edo gizarte langilearen edo oinarrizko gizarte zerbitzuen txostena, eria eskatzaileak zaindu behar duela frogatzen duena.

Borondatezko Eszedentzia

 

 

 1. Borondatezko eszedentzia deklaratzen ahalko da, funtzionarioek eskatuta, ondoko kasu hauetan:

a) Zerbitzuak egiten hasten bada beste Administrazio Publiko batean edo langilearena ez den beste Administrazio baten menpekoa den eta berezko nortasun juridikoa duen entitate batean; betetzen zuen lanpostua hemezortzi hilabetez gordeko zaio.

Puntu honetan xedatutakotik salbuetsita gelditzen dira Osasunbidea-Nafarroako Osasun Zerbitzuko langileak, baldin eta modu finkoan lan egiten badute Nafarroako Osasun Zerbitzua-Osasunbideari atxikitako langileen berariazko araubidea arautzen duen urriaren 20ko 11/1992 Foru Legearen espezialitateen eranskineko A.1 eta A.2 5 osasun estamentuetako batean. Langile horiek borondatezko eszedentziaren modalitate hori lortzen ahalko dute bakarrik zerbitzu finkoak ematen hasten badira beste Administrazio Publiko batean edo beste Administrazio baten menpekoa den eta nortasun juridiko propioa duen entitate batean, eta interesduna gutxienez bi urtez jardunean edo egoera parekatuan egon bada, Osasunbidea-Nafarroako Osasun Zerbitzuko A.1 eta A.2 5 osasun estamentuetako batean lanpostu baten jabetza hartzen denetik kontatzen hasita.

b) Lanpostuaren jabetza hartzeko unean zerbitzuak egiten ari baldin bada beste Administrazio Publiko batean.

c) Administrazio Publiko beraren baitan, maila bereko edo desberdineko beste lanpostu bat, unitate organikoko burutza edo zuzendaritza direnak izan ezik, eskuratzen duen funtzionarioak bietako bat aukeratu beharko du, eta beste lanpostuan borondatezko eszedentzian deklaratzea eskatzen ahalko du.

d) Horretan interesa duenak hala eskatu ondoren, funtzionarioa borondatezko eszedentzian dagoela deklaratuko da Administrazio Publiko berean maila bereko edo desberdineko lanpostu bat aldi baterako betetzen hasten denean, eta ordura arte bete zuen lanpostua gordeko zaio hasierako hemezortzi hilabeteetan.

e) Funtzionario gisa lanpostuaren jabetza hartzeko unean langilea betetzen ari bada Administrazio Publiko berean maila bereko edo desberdineko beste lanpostu bat aldi baterako, funtzionario lanpostuan borondatezko eszedentzian deklaratzea eskatzen ahalko du.

f) Alderdi politiko, sindikatu edo lanbide erakundeetan zuzendaritza karguak betetzeko, funtzio publikoan aritzearekin bateraezinak badira.

g) Funtzionarioaren interes partikularrengatik. Jatorrizko lanpostua hasierako hemezortzi hilabetez gordeko da, zerbitzuaren beharrek horretarako bide ematen badute eta interesdunak egiaztatzen baldin badu eskaera egin aurreko bi urteetan, gutxienez, jardunean edo egoera parekatu batean aritu dela.

2. Borondatezko eszedentzia, betiere, epe mugagabetzat eman dela ulertuko da.

3. Aski justifikaturiko beharren bat salbu, borondatezko eszedentzian dauden funtzionarioek ezin izanen dute jarduneko zerbitzuan berriz sartzerik eskatu, borondatezko eszedentzian urte bat eman arte. Itzultzea erabaki ondoren, hilabeteko epean gauzatu behar da. Hala egin ezean, langileak galdu eginen du funtzionario izaera

4. Borondatezko eszedentzian dauden funtzionarioek hartutako maila, gradu eta antzinatasuna gordeko dute baina ez dute eskubide ekonomikorik sortuko, ezta ez zaie inolako ondorioetarako egoera horretan iragandako denbora kontuan hartuko ere.


Aurkeztu beharreko agiriak:

  • Irakasleak: Giza Baliabideen Zerbitzura zuzendutako eskaera, hasierako data adieraziz.
  • Irakasle ez diren langileak: Funtzio Publikoaren Zuzendaritza Nagusira zuzendutako eskaera, hasierako data adieraziz.