Laneko Arriskuen Prebentzioa

Hezkuntza Departamentuko Prebentzio Zerbitzuak Departamentu horri atxikitako unibertsitateaz kanpoko irakasleei eta irakasle ez direnei ematen die arreta.

Kontaktua: Laneko Arriskuei Aurrea hartzeko Atala
Mezu elektronikoak: seccion.prevencion.educacion@navarra.es
Telefonoa: 848 42 37 69, 848 42 65 85, 848 42 37 28 Fax: 848 42 37 38

es-es eu-es
Antolaketa-modalitatea

Prebentzio-jarduerak garatzeko antolaketa-modalitatea.

Prebentzio Zerbitzuei buruzko 39/1997 Erregelamenduaren 14. artikuluan ezartzen denez, nahitaezkoa dela prebentzio-zerbitzu propioa eratzea enpresak 500 langiletik gora badu.

135/1998 Foru Dekretuaren eta hura aldatzen duen 121/2008 Foru Dekretuaren bitartez, laneko arriskuen prebentzioari buruzko araudia egokitu egin zen Nafarroako Foru Komunitateko Administraziora eta haren erakunde autonomoen esparrura. Dekretu horietan honako hau ezartzen da:

  • Foru Komunitateko Administrazioan prebentzio-jarduerak garatzeko beharrezkoak diren baliabideak prebentzio-zerbitzu propioen modalitatean antolatuko dira.
  • Hiru prebentzio-zerbitzu eratuko dira: bata, Osasunbidea-Nafarroako Osasun Zerbitzurako; bigarrena, Hezkuntza Departamenturako; eta hirugarrena, Foru Komunitateko Administrazioaren gainerako zerbitzuetarako eta haren erakunde autonomoetarako. Prebentzio-zerbitzu horiek jarduera koordinatua eta elkartua izanen dute Nafarroako Foru Komunitatearen Administrazio osoan.
  • Hezkuntza Departamentuko Prebentzio Zerbitzuak arreta emanen die departamentu horri atxikitako irakasleei eta irakasle ez direnei.

 

Zerbitzu hori Osasun Departamentuaren egitura organikoari atxikita dago, eta Laneko Arriskuen Prebentziorako Atalaren forma administratiboa du, Laneko Arriskuen Prebentziorako Zerbitzuaren barnean (Lan Osasunaren zuzendariordetza).

Hezkuntza Departamentuko Prebentzio Zerbitzuko plantillan osasun-arloko langileak eta arriskuen prebentziorako teknikariak daude, eta prebentzioaren arloko diziplina guztietakoak dira.

Prebentzio Zerbitzuaren eginkizunak

Hezkuntza Departamentuko Prebentzio Zerbitzuak indarreko araudian ezarritako eginkizunak garatuko ditu; bereziki, 135/1998 Foru Dekretuaren 10. artikuluan ezartzen den bezala, Laneko Arriskuen Prebentzioari buruzko Legearen 31. artikuluan eta Prebentzio Zerbitzuen Erregelamenduaren III. kapituluan ezarritakoak.
Bestalde, abuztuaren 24ko 132/2011 Foru Dekretuaren 48. artikuluan ezartzen denez, Laneko Arriskuen Prebentziorako Atalak eginkizun hauek izanen ditu:

  • Laneko arriskuak prebenitzeari buruz indarrean dagoen araudian ezarritako eginkizunak eta, bereziki, Laneko Arriskuen Prebentzioari buruzko 31/1995 Legearen 31. artikuluan eta Prebentzio Zerbitzuen Erregelamendua onesten duen 39/1997 Errege Dekretuaren III. kapituluan ezarritakoak.
  • Prebentzio-jarduketarako planak eta programak diseinatu, aplikatu eta koordinatzea.
  • Langileen segurtasunean eta osasunean eragina izan dezaketen arrisku-faktoreak ebaluatzea, Laneko Arriskuen Prebentzioari buruzko 31/1995 Legearen 16. artikuluan ezarritakoaren arabera.
  • Lehentasunak zehaztea prebentzio-neurri egokiak hartzerakoan, eta haien eraginkortasuna begiratzea.
  • Langileei informazioa eta prestakuntza ematea, laneko arriskuen prebentzioaren esparruan.
  • Prebentzio-arloko aholkuak eta laguntza teknikoa ematea ikastetxeetako zuzendariei, unitate administratiboen arduradunei eta, oro har, departamentuko langile guztiei.
  • Langileen osasuna zaintzea, lanaren ondoriozko arriskuei dagokienez.
  • Indarrean dauden xedapenek esleitzen dizkioten gainerako eginkizunak, eta helburuak egoki betetzeko agintzen zaizkion guztiak, haren kudeaketa-esparrukoak badira.

Prebentzio Zerbitzuaren jardueren programazioa eta urteko memoria

Prebentzio Zerbitzuen Erregelamenduaren 15. artikuluko 5. apartatua betez, urtero dokumentazio hau prestatuko da:

1. Prebentzio Zerbitzuaren urteko memoria.
2. Prebentzio Zerbitzuaren jardueren urteko programazioa.

Bi agiri horiek lan- eta osasun-arloetako agintari eskudunen eskura edukiko dira, eta Segurtasun eta Osasun Batzordeari aurkeztuko zaizkio (Laneko Arriskuen Prebentzioari buruzko 31/1995 Legearen 39. art.).